tenpo poka la mi tawa tomo pi pona sijelo.
tomo la mi tawa ilo wawa lukin mi lon insa ona
ilo ni li ken lukin e insa mi kepeken wawa ona
wawa ona li kama tan wawa ilo mute.
ilo li pana e wawa ni tawa kiwen wawa.
ilo li wawa e kiwen la wawa kiwen li kama suli li kama ken jo wawa e ijo pi kiwen ilo.
o pana ala e kiwen tawa ona!
ona li alasa moku e kiwen kepeken wawa!
ni li pakala mute e ilo e kiwen.
wawa ilo li sike mute lon kiwen wawa la wawa kiwen li kama suli.
wawa li kama lon insa mi tan suli ona. taso, mi ken ala pilin e ni. mi kiwen ala.
wawa suli ni li ken nasa lili e pilin, taso mi kiwen ilo ala la ilo li ken ala pakala e mi!
wawa ni li ante e ijo pi lili nanpa wan lon insa mi.
wawa li ni e ijo lili: ona o lukin tawa ma sama.
ona li jo ala e lukin la ona li ken ala lukin sama jan
ona li ken lukin e ma sama palisa lon sitelen pi nimi alasa.
ona telo li ken ni tan sijelo ona. ona li ken lukin sama palisa.
ona pi telo ala li ken sama, taso ona li ante mute lon sijelo ona!
taso, ijo lili li wile ala ante e lukin. wawa li weka la ijo lili li kama sin tawa lukin pona lon tenpo poka.
tenpo mute la ilo li pana e wawa li weka e wawa.
wawa li kama la, ijo lili li lukin. wawa li weka la, ijo lili li sin.
ona li kama sin la ona li pana e wawa lili tan ante ni.
ilo li lukin e wawa lili. ni la ona li ken sona e insa mi!
suli la, ijo lili ante li pana e wawa ante lon tenpo ante.
ni li suli tawa ilo. ilo li ken sona e ante selo, e ante pi palisa sijelo, e ante telo, e ante ale.
mi lon ona tan pilin pakala a!
tenpo suli la mi pilin ike lon sewi pi monsi mi lon anpa pi lawa mi.
ike ni li ken weka li ken ike mute, li ante lon tenpo.
ike ni li kama suli la ijo mute ike li kama lon poka.
nanpa wan la mi kama ken ala toki insa pona. ni li ike monsuta tawa mi.
nanpa tu la mi kama ken ala pilin kepeken palisa luka kepeken noka kepeken sike lon sinpin mi.
ken pilin li weka la pilin ni taso li awen: palisa lili ike li lon selo mi a.
ni la, mi tawa ilo. ilo li lukin e insa mi.
ona li kama sona e ni: ala li pakala!
ijo ale pi insa mi li lon ma pona ona.
pakala a. ni la seme li pakala?
mi sona ala a! mi awen sona ala.
taso, pona la, pilin ike li kama lili li weka lon tenpo tan ni:
mi lukin e nasin awen pi sijelo mi, mi ante e ni.
kin la mi awen pona lon supa sin, a a a