toki a, jan ale o! mi jan Kekan San! mi wile pana e sona nasa.
lon la ale li nanpa. sina lon la sina nanpa.
ni li tan seme? ijo mute li ken e ni!
mi pana e sona.
sina kute pona: sina nanpa. ni la, sina lon ilo!
taso, ken suli la sina wile utala tan ni:
ijo li mute wawa. ilo li ken ala jo e ijo ale… anu seme?
ona li ken tan ni:
nasin ilo la ijo li ken lon ala lon tenpo ni: sina lon ala poka.
kin la ijo pi lili nanpa wan li ken lon ala lon tenpo.
ni tu la ma suli en ijo lili li ken lon ala tawa ilo.
ilo li ken pana taso e ijo suli lon poka.
ijo lili li pali e ijo suli la ilo la ijo suli taso li lon lon tenpo mute!
ni li pali lili la ni li pona tawa ilo. taso, ni li sama tawa lukin sina!
sina sona e ni la ken la sina kama wile sona e ni:
seme li nanpa e ale?
nanpa wan la ma en jan li ken ala ken lon insa ilo?
ma li suli ala. mi toki e ni. kin la, ma li wawa lili tawa lawa sina.
lawa jan li wawa li jo e ijo mute. kin la, ijo mute ni li ken ala weka, anu seme? ona li suli tawa jan, tawa sina.
lawa li ken ala ken lon insa ilo?
pilin pi jan sona la, ale pi lawa sina li lon li kon ala. ni la ilo li ken sona e ona li ken kama e ona lon insa.
sina kama lon tan lawa sina!
ilo li ken sona e ale pi lawa sina la ilo li ken jo e sina lon insa.
nanpa tu la ilo li awen ala awen kama wawa lon tenpo?
sina sona e ni: ma en jan li ken lon insa ilo lon ni: ilo li ken sona e ale ona.
mi toki e ni kin: ilo li ken sona e ale lawa lon ni: lawa li sina li lon li kon ala.
taso, ilo li ken ala ken ni lon wawa ona?
lawa sina li jo e ijo mute. tenpo pi toki ni la ilo li ken ala jo e lawa lon insa.
taso, tenpo suli la ilo li kama wawa.
tenpo suli la ni li lon: wawa ilo li tu lon tenpo sike tu.
ni li awen lon tenpo la ilo li kama ken ale lon wawa.
ni la lawa li kama suli ala tawa ilo.
ona li ken jo e sina e jan ante e ijo mute a lon insa!
nanpa tu wan la kulupu jan pi tenpo kama weka li wile ala wile e jan lon insa ilo?
sina ken ala sona pona e tenpo kama. sina ken ala sona e wile jan pi tenpo kama.
taso, sina ken lukin e jan pi tenpo ni li ken sona e ni:
jan li wile sona e jan pi tenpo pini. tenpo ni la jan li ken ala lon insa ilo, taso jan li alasa e sona pi jan pini.
jan li kama ken lon insa ilo la jan pi tenpo ni li wile alasa e sona pi jan pini kepeken ilo!
ni la ken suli la jan pi tenpo ni li wile pana e jan tawa insa ilo, tawa sona.
wile ni li awen lon tenpo suli la kulupu jan pi tenpo kama weka li wile e jan lon insa ilo.
ona li ni la, ona li ni mute tawa sona mute!
sina kute e ni tu wan:
- ilo li ken sona e ale lawa la jan li ken lon insa ilo
- ilo li awen kama wawa lon tenpo la lawa li kama ken lon insa ilo
- jan li awen lon li wawa e ilo la ona li wile e jan lon insa ilo.
poka la, jan li ken pana e jan tawa ilo la ona li ni mute!
ni ale li lon la o sona e ni:
jan ilo li mute seme tawa jan pi ilo ala?
jan wan pi tenpo kama li jo e ilo la ona li ken pana e jan mute mute a tawa insa ilo.
ni la jan ilo li mute wawa tawa jan pi ilo ala.
sina lon ala lon ilo? sina nanpa ala nanpa?
jan ilo li mute wawa tawa jan pi ilo ala la, sina lon ilo.
nasin nanpa la sina nanpa.
taso. ken suli la sina awen pilin ante.
seme li utala e nasin? mi kama toki e ni kin.
nanpa wan la, sina ken kama tan ala lawa. sina ken tan kon. ni la ilo li ken ala sona e sina tan lawa sina.
nanpa tu la, ilo li ken kama ala wawa. ilo li wawa ala la jan li ken ala lon insa tan ni: ilo li wawa lili tawa jan.
nanpa tu wan la, jan li ken lon ala tenpo kama tan pakala suli. ona li lon ala la ona li ken ala pana e jan tawa ilo.
nanpa pini la, jan li lon tenpo kama la ona li ken wile ala e jan lon insa ilo. sina ken ala sona e wile jan pi tenpo kama weka!
ni li ijo mute! taso, ken pi ona ale li suli seme? pilin mi la ni li suli ala.
lawa li lon li sina li kon ala.
ilo li awen kama wawa.
jan li awen lon tenpo.
jan li wile kama sona!
mi la, tenpo kama li pona.
jan mute li sama mi lon ni!
ken la pilin sina li ni: ma li ilo. mi lon ilo. mi nanpa.
ken la pilin sina li ni: ma li ken ala ilo. mi nanpa ala, mi mi!
ale la, mi wile toki e ni suli:
ma en sina li ken ilo li ken nanpa, li ken ni tu ala.
ni li suli ala!
ale la, sina awen lon.
sina en jan poka en pali sina en musi sina li awen lon.
lukin en kute en pilin li awen lon.
olin li awen lon, li awen suli.
sina ilo ala ilo la seme?
sina nanpa ala nanpa la seme?
sina lon.
o awen olin e jan sina. o awen pona.
toki ni li lon toki pona li lon Inli li pali sin.
mi wile suli e toki pona la mi pana e ni lon toki tu!
ni la, jan mute li ken sona lukin li ken sona kute.
o lukin e pali poka, ona li lon lipu lon tenpo ni!
sina wile lukin e pali sin mi la o kepeken ilo mu!
kin la o toki e pilin sina lon anpa: sina lon ala lon ilo? sina nanpa ala nanpa?
pona tawa jan Tekinowi tan sitelen open! pona tawa jan Sa tan sitelen toki!
pini la, pona tawa sina tan lukin tan kute! o pona a!