tomo pi walo loje

toki a, jan ale o. mi jan Kekan San pi walo loje. mi wile musi.

ni li toki pona taso.

o kute pona e musi mi

tenpo la, jan li lon ilo suli li tawa tomo ona. ni li wile e tenpo suli la ona li lon nasin lon tenpo suli!

ona li lukin e tomo mute lon poka. tomo li kama li weka. ilo ona li wawa la ona li tawa wawa!

taso, pakala suli li kama a! jan li sona ala e tan, taso ilo ona li kama ken ala tawa. ona o awen.

jan awen li weka tan ilo li toki e ni: "a, pakala. ilo mi li pakala la mi ken ala tawa tomo mi! mi o seme?"

ona li lukin e tomo lon poka li sona e ni: ona li ken tawa tomo poka wan li ken toki tawa jan tomo.

ken la, jan tomo li ken pona e ilo ona!

ona li lukin e tomo mute lon poka li alasa sona e ni: ona o tawa tomo seme?

ona li kama lukin e tomo wan ken.

taso.

tomo ni li nasa. ona li nasa suli a!

ni li tan seme?

ni li tan ni: tomo li walo loje.

jan li lukin e tomo, li lukin e ni:

nasin lili li tawa sinpin tomo li walo loje.

kasi li lon poka nasin li walo loje.

sinpin tomo li lon pini nasin li walo loje.

poki lipu li lon poka sinpin... li walo loje!

jan awen li tawa nasin lili pi walo loje, li kalama luka lon sinpin tomo pi walo loje.

ona li awen lon tenpo.

kama lili la, jan tomo li tawa sinpin pi walo loje li open e ona.

jan awen li lukin e jan tomo.

ona li jo e ilo lukin pi walo loje lon sinpin ona.

ona li jo e len wawa. len li tan tenpo suli musi, li walo loje lon sewi, lon anpa, lon noka!

ona li kama toki e ni:

"toki! kama pona tawa tomo mi. sina wile e seme"?

jan awen li kama toki tawa ona.

"a, toki. ilo mi li pakala, li lon poka pi tomo sina. mi ken ala tawa tomo mi. sina ken ala ken pona e ilo mi?"

jan tomo li toki e ni:

"mi ken! taso ni li wile e tenpo. mi pona e ilo sina la sina ken awen lon tomo mi. o kama!"

jan tomo li luka tawa insa tomo, li kama e jan awen.

jan awen li kama lon tomo li lukin e ijo mute lon tomo.

supa suli li lon poka pi ilo musi. jan mute li ken awen lon supa ni li ken lukin e musi lon ilo. supa li walo loje.

ilo musi li suli a li pana e sitelen li ken kalama wawa lon pana! selo ona li walo loje.

supa lili li lon insa pi ni tu li ken jo e poki telo e noka. ona kin li walo loje.

jan tomo li kama li toki e ni: "sewi tomo la sina ken lon supa. sina awen la mi pona e ilo sina. o lape pona a."

jan awen li tawa sewi tomo lon nasin sewi pi leko mute. nasin sewi la leko ale li walo loje.

jan awen li kama lon tomo sewi li lukin e supa lape. supa li walo loje. len pi supa lape li walo loje.

kin la, poki li lon supa li suwi tawa pilin li pona tawa lawa, li walo loje.

jan awen li awen e lawa ona lon poki pi walo loje, li awen e sijelo ona lon supa lape pi walo loje, li pilin pona lon anpa len pi walo loje.

...

tenpo suno kama la, jan awen li weka tan supa pi walo loje li tawa nasin anpa pi walo loje.

ona li tawa tomo moku. selo pi tomo moku li walo loje. supa tomo kin li walo loje.

supa suli li lon li ken e jan poka mute lon tenpo moku. supa ni li walo loje.

supa monsi mute li lon poka pi supa suli. supa ni kin li walo loje.

ilo moku en supa moku li lon supa suli li walo loje.

jan awen li kama lukin e jan tomo. jan tomo li lukin e ona li toki e ni:

"a! kama pona. mute la mi pona e ilo sina. mi pini e ni lon tenpo poka."

jan awen li pilin pona tan ni! jan tomo li awen toki:

"tenpo ni la sina ken moku. mi jo e kala e pan. sina wile e seme?"

jan awen li pilin li toki e ni:

"mi wile a e pan!"

ni la, jan tomo li tawa poki moku lon sinpin tomo li open e ona. poki ni li walo loje.

jan tomo li lukin e insa poki li kama jo e pan tan ona. pan, kin, li walo loje.

jan tomo li pana e pan tawa supa lili pi walo loje, li pana e supa pi walo loje tawa jan awen...

jan tomo li awen li moku pona e pan pi walo loje kepeken ilo moku pi walo loje.

ona li pini la ona li weka tan supa pi walo loje li tawa tomo ilo.

jan awen kin li moku e pan ona tan supa pi walo loje, kepeken ilo moku pi walo loje.

tenpo lili poka la jan awen kin li tawa tomo ilo.

jan tomo li pona ale e ilo la ona li toki e ni tawa jan awen: "tawa pona!"

jan awen li kama lon ilo ona li tawa tomo ona. weka la ona li luka tawa jan tomo li toki e ni: "sina pona a!"

tenpo kama weka la, ale li lete.

jan sin li lon ilo wawa li tawa tan ni: ona li weka tan pali lon tenpo suli li kama sin tan tenpo lape.

tenpo ni li pali ala li pona tawa ona, taso ona li wile kama sin lon tomo ona!

ona li wile lape lon supa lape ona.

taso, kalama nasa li kama tan ilo ona. ilo ona li kalama suli sama ni: soweli suli ike li utala e ilo!

jan li tawa poka nasin la ilo li pini. ona li ken ala open sin! pakala suli.

ona li lukin e tomo mute lon poka. ken la, jan li lon li ken pona e ilo ona.

jan awen li kama lukin e tomo ni:

nasin li lon li tawa sinpin tomo li walo loje

ilo lili li lon poka nasin li pana e suno pi walo loje lon nasin pi walo loje.

palisa suli li awen e sewi tomo li walo loje. sewi tomo kin li walo loje.

lupa lukin li lon sinpin tomo li lon sewi tomo kin li walo loje!

jan awen li kama jo e poki ona tan ilo ona, li tawa tomo pi walo loje lon nasin pi walo loje, li kalama luka lon sinpin tomo.

tenpo la jan li kama li open e tomo pi walo loje!

jan awen li lukin e jan tomo.

jan tomo li jo e len seli pi tenpo lape. len li walo loje.

ona li jo e len suwi lon noka ona. len ni kin li walo loje.

ona li luka lili e lukin ona tan pilin lape la jan awen li lukin e ilo tenpo lili lon luka ona. ilo tenpo li walo loje.

jan tomo li lukin e jan awen lon poka pi tomo ona li toki e ni:

"a... toki! sina pini e lape mi, a a. taso, ale li pona. seme li lon?"

jan awen li kama toki tawa ona:

"toki toki. mi wile ala pini e lape sina. taso, mi wile e pona sina. ilo mi li pakala, li lon poka pi tomo sina li ken ala tawa. ni la mi ken ala tawa tomo mi. sina ken ala ken pona e ilo mi?"

jan tomo li awen lon tenpo lili li toki e ni:

"mi ken pona e ilo sina! taso, ni li wile e tenpo. o kama, sina o weka tan lete. o kama lon tomo."

jan tomo li luka tawa insa tomo, li kama e jan awen.

jan awen li kama lon tomo li lukin e ijo mute lon tomo.

ona li lukin e supa pi lipu mute. sona mute li lon lipu. supa en lipu ale li walo loje.

kin la ona li lukin e supa monsi e ilo suno lon poka.

supa monsi li walo loje. ilo suno li walo loje, li pana e suno pi walo loje lon lipu.

jan awen li lukin e supa noka lon insa tomo. supa noka li suwi len tawa pilin li walo loje.

jan tomo li kama li toki e ni: "ni li tenpo pi pimeja suli la sina ken lape lon tomo. o tawa sewi, supa lape li lon. o lape pona. tenpo suno kama la mi pona e ilo sina."

jan awen li pilin pona, li toki e ni: "sina pona suli a." ni la, ona li tawa sewi tomo, lon nasin sewi pi walo loje.

ona li kama lon tomo la ona li lukin e supa lape. supa lape li walo loje, li jo e len pi walo loje kin.

sinpin tomo la lupa lukin li lon. ni la jan awen li lukin sin e ma lon poka tomo, e nasin pi walo loje, e kasi pi walo loje, e ilo ona.

jan awen li tawa mute lon tenpo suno ni la ona li wile lape a.

ona li kama lon supa pi walo loje, li lon anpa len pi walo loje, li lape lon tenpo suli.

suno li kama sin lon sewi la jan awen li weka tan lape.

ona li jaki lili tawa pilin li wile weka e jaki kepeken telo.

ona li tawa tomo poka li suno e tomo. suno li walo loje.

ona li weka e len ona li tawa poki telo pi walo loje.

ona li open e telo kepeken ilo pi walo loje lon sinpin poki.

telo li walo loje.

pini la ona li weka tan poki pi walo loje, li lukin e poki len.

poki len li walo loje lon sinpin, li walo loje lon insa, li jo e len mute.

len li weka e telo tan selo li walo loje.

jan awen li kama jo e len pi walo loje, li weka e telo pi walo loje, li kama jo e len ona tan poki ona.

ni la, ona li weka tan tomo lape, li tawa tomo anpa kepeken nasin pi walo loje.

tenpo sama la, jan tomo li tawa insa tomo li toki e ni:

"a, pona! sina lape ala. tenpo poka la mi pona ale e ilo sina. taso, mi pini ala la sina o awen lili."

jan awen li pilin pona suli tan ni. tenpo poka la ona li ken tawa tomo ona!

jan tomo li toki sin:

"tenpo ni la sina ken moku. mi jo e kala e pan. sina wile e seme?"

jan awen li pilin li toki e ni:

"n, mi wile e pan..."

jan tomo li tawa poki moku pi walo loje, li kama jo e ijo mute.

ona li pana e poki pan pi walo loje, e supa moku pi walo loje, e ilo moku pi walo loje tawa supa suli pi walo loje.

ni la jan tomo li toki e ni:

"mi wile pona e ilo sina la mi o tawa o ni lon tenpo ni. pakala la mi ken ala awen. taso, o moku pona! mi kama sin lon tenpo poka."

ni la, ona li kama jo e poki ilo pi walo loje tan supa noka pi walo loje, li weka tan tomo.

jan awen li open e poki pan pi walo loje. pan insa li walo loje.

ona li kama jo e lipu pan tu. ona li wile a e pan, taso ona li wile e pan seli!

ona li lukin e supa pali lon tomo, li alasa e ilo seli.

ilo seli li lon li walo loje! lupa li lon ona la jan awen li pana e pan tawa insa ilo li anpa e nena ilo li awen.

ilo li pana sin e pan ona kepeken tenpo lili. pan li awen walo loje.

jan awen li moku pona e pan pi walo loje.

tenpo poka la, jan tomo li kama sin li toki e ni:

"mi pona ale e ilo sina! o tawa pona a!"

jan awen li pilin pona wawa a.

jan tomo li luka tawa nasin weka. ona tu li weka tan tomo li lukin e ilo.

ilo li pona la, jan awen li kama lon ilo, li luka a tawa jan tomo lon weka.

tenpo li kama li weka. jan sin li lon li tawa lon nasin kepeken ilo.

taso! tawa ona li pini lon tenpo poka tan ni:

ona li lukin pona ala. kiwen li lon nasin li pakala e sike pi ilo ona!

ni li ike a. ilo li ken ala tawa pona lon sike pakala!

ona li pini e tawa ilo lon poka nasin.

taso, ona li jo ala e sike ante la ona li ken ala pona e ilo.

pilin ona la ona li ken toki tawa jan lon tomo. ken la, jan li lon li ken pona e ilo ona.

ona li lukin e tomo mute lon poka li kama lukin e tomo ni:

nasin lili li lon li walo loje, li jo e kasi suwi mute lon poka. kasi kin li walo loje.

sinpin lili mute li selo e ma lon poka tomo, li walo loje.

ilo sike li lon sewi tomo li kute e wawa tan ilo weka. ona li walo loje.

supa awen en supa monsi li lon poka tomo, li walo loje.

jan awen li tawa sinpin tomo li kalama luka lon sinpin li awen.

tenpo li weka lili. jan awen li luka sin lon sinpin.

jan li kama li open e tomo li lukin e ona, li toki e ni:

"a! mi pakala. mi kepeken tenpo suli tan ni: mi weka tan tomo telo lon tenpo poka. seme li lon?"

jan awen li lukin e jan tomo e len ona. lukin la, ona li toki lon.

linja lawa ona li telo a, li walo loje. len ona li suli li weka e telo tan selo ona, li walo loje.

ona li jo e supa lili lon anpa noka, e linja lon supa. supa en linja li walo loje.

jan awen li kama toki tawa ona:

"sina pakala ala a! o sona e ni: tenpo poka la, sike pi ilo mi li kama pakala. mi jo ala e sike ante la mi ken ala pona e ilo li ken ala tawa tomo mi. sina ken ala ken pona e sike mi?"

jan tomo li pilin insa li toki e ni:

"mi ken pona e ona! ni li wile e tenpo lili, taso mi jo ala e ko tawa ni. mi o tawa tomo esun o kama jo e ni. mi ni lon open pi tenpo suno kama. o kama lon tomo!"

jan tomo li luka tawa insa tomo la jan awen li kama.

ona li lukin e ijo mute lon tomo.

lukin la jan mute li lon tomo li musi wawa lon tenpo poka!

poki moku li lon supa suli li walo loje.

musi supa li lon supa noka li walo loje.

lukin la jan mute li musi- ilo lili mute en lipu mani mute li lon poka li walo loje.

sike kon li lon li walo loje. linja li awen e ona lon supa li walo loje.

jan tomo li toki sin:

"sina o awen tan pakala ilo la, sina ken awen lon tomo mi. sewi tomo la, supa lape li lon. sina ken kepeken ni!"

jan tomo li luka tawa sewi tomo, tawa nasin sewi- selo nasin en leko ale nasin li walo loje.

jan awen li pilin pona a, li toki e ni tawa jan tomo: "sina pona sewi!"

ni la, jan awen li tawa tomo sewi kepeken nasin sewi pi walo loje.

ona li kama lon tomo sewi la, ona li lukin e supa lape pi walo loje, e supa pi ilo suno poka. ona kin li walo loje.

wawa la ona li wile e lape.

ni la, ona li weka e len, li pana e len tawa supa poka pi walo loje.

ona li kama lon supa lape pi walo loje, li pana e len pi walo loje lon sewi ona, li pini e suno pi walo loje, li lape lon tenpo suli.

suno suli li kama lon sewi li utala e lukin pi jan awen la ona li weka tan lape.

ona li kama jo e len ona tan supa pi walo loje, li tawa tomo anpa kepeken nasin pi walo loje.

jan tomo li kama tan lupa open lon tenpo ni, li jo e poki pi walo loje.

ona li lukin e jan awen li toki e ni:

"a! kama pona tan lape! mi kama sin tan tomo esun, li jo e ko wile e ilo wile. ni la mi ken pona e ilo sina."

jan awen li pilin wawa a tan ni!

jan tomo li toki sin:

"mi o pona e ilo sina lon tenpo poka. taso, sina ken awen li ken moku. mi jo e kala e pan. sina wile e seme?"

jan awen li pilin lon tenpo suli. ona li sona ala e wile. ona li alasa e pilin, li awen, li kama sona e wile.

ona li toki e ni:

"kala li pona tawa mi. mi wile e kala. sina pona."

ni la, jan tomo li pana e poki ona pi walo loje tawa supa pi walo loje, li tawa poki lete pi walo loje lon tomo moku pi walo loje.

ona li kama jo e kala pi walo loje tan poki lete pi walo loje, li pana e ona tawa ilo seli pi walo loje, li open e seli.

tenpo lili la, kala li seli pona li awen walo loje.

jan tomo li pana e kala tawa supa moku pi walo loje, li pana e ni tawa jan awen, li toki e ni:

"o moku pona!"

ni la, ona li kama jo e poki ona pi walo loje, li weka tan tomo pi walo loje.

jan awen li lukin e kala pi walo loje, li kama sona e ni: ona li jo ala e ilo moku!

ona li alasa e ilo moku lon tomo. poki mute li lon li walo loje.

jan awen li open e ona ale, li kama lukin e poki pi ilo moku.

ilo moku mute li lon insa, li walo loje!

jan awen li kama jo e ona wan, li tawa moku ona, li moku e kala pi walo loje.

ona li pona mute a!

tenpo lili la, jan tomo li kama sin li toki e ni:

"mi pona a e ilo sina! ni la, sina ken tawa tomo sina."

jan awen li pilin pona la, ona li jo luka e jan tomo! ona tu li pilin musi mute tan ni.

ni la, jan awen li weka tan tomo pi walo loje, li kama lon ilo ona, li tawa tomo ona.

ni la, toki mi li pini. mi toki mute a.

ken la, sina wile sona e ni: sina kama sona e seme tan toki mi?

sina kama sona e ni:

jan tu wan la, jan tu li wile moku e pan, jan wan li wile moku e kala.

A A A A A A A A

MI MOKU E TENPO SINA LI MUSI ALA