jan Kekan San

jan Kekan San

sona pi tawa suno

mi pana e ni kin tawa lipu tenpo. ni li lipu pi nasin sona a

suno li tawa kepeken tenpo sama lon ma ale. wawa suno li ken ante. suno li ken tawa lon insa ijo. taso tenpo pi tawa suno li awen sama. suno li tawa lon insa ijo la, nasin ona li palisa ala. suno li tawa lon ala insa ijo la nasin suno li palisa. palisa ala la jan li ken lukin e suno li ken sona e ni: suno li tawa kepeken tenpo ante! taso, ni li lon ala. suno li lon insa ijo la suno li tawa lon poka ijo. nasin tawa li palisa ala. tenpo tawa ante li tan lukin taso, li lon ala. ni ale la, suno li tawa kepeken tenpo sama lon ma ale a!

sina ken ala tawa sama suno. suno li tawa wawa tan ni: sina jo e suno la sina pilin ala e ona e suli ona tan suli ala. sina pilin taso e wawa ona e seli ona. sina alasa tawa sama suno la sina ken ala tan ni: jan ante li jo e sina la ona li pilin e sina e suli sina!

taso, lili la sina tawa sama suno. ni la seme li kama? sina lukin e suno la suno li awen tawa sama. sina tawa lili anu tawa wawa anu tawa ante la suno li awen tawa sama. tawa pi wawa ale la suno li tawa sama. ni la seme li ante? suno li ante ala la ijo o ante.

ante li ni: sina tawa sama suno la tenpo o ante. tenpo sina li sama. tawa suno pi lukin sina li sama. taso, jan ante li tawa ala la tenpo ona li suli tawa tenpo sina! tenpo sina li lili.