sina suli. sina lukin e ijo la, ijo li wan tawa lukin. sina wan tawa lukin! taso, o sona: ijo mute mute li lon insa ijo, li lon insa sina! lon la, ijo ale li jo e ijo mute lon insa ona. ijo wan taso li suli ala li pali lili a. sina ken ala lukin e ijo lili. taso, sina ken lukin e ijo suli. sina lukin e ijo lili tan ni. ijo lili li kama kulupu li kama wan la sina en ijo suli li kama lon!

sona ni la suli tu li lon: lukin la ijo lili li ken seme? lukin ala la ijo lili li ken seme?

lukin la ijo lili li lon. ijo li tawa lon ma. sina ken pilin e ijo. sina ken lukin e ijo. sina ken sona e tawa ijo. sina lukin e ijo lili la ijo lili li awen ijo.

lukin ala la nasa li kama. ale li lukin ala li pilin ala e ijo la ijo li tawa kepeken tenpo ala, li ken tawa nasa! nasa la ijo lili li ken lon tomo tawa lukin, li ken weka tan tomo lon lukin ala. seme a? ijo suli li ken ala ni. lon la, ijo lili li ken.

ken pi tawa nasa li tan ni: sina lukin ala la ijo li kama kon wawa. kon wawa la tawa mute en wawa mute li ken tawa ijo lili! sina lukin e ijo lili la ijo lili li ken wan taso: ona o awen sama. lukin ala la ken ale pi ijo lili li kama lon. ijo lili li kama kon wawa ala li kama ijo tan lukin!

ni li sona nasa a. seme li lon a? ale li kon wawa anu seme? ala. taso, ijo ale li ken kon wawa tan ni: ona la ijo ante li lukin ala li pilin ala.

sina wile sona e nasa pi kon wawa la o awen kute. mi pana e ijo sona!

soweli li lon insa poki. sina ken ala lukin e soweli. poka soweli la poki pi kon moli li lon, li ken moli e soweli tan ni: ilo ante li lukin e ijo lili. ijo lili li pakala lili li pana e wawa la ilo li sona e ni, li open e poki moli. ijo lili li pana ala la poki li open ala. taso, pakala lili pi ijo lili li tan seme? ona li ken pakala lili tan tenpo.

sina awen lon tenpo ken pi pakala lili. sina awen lukin ala e soweli. sina awen lukin ala e ijo lili. ilo taso li sona e pakala. pakala lili li kama ala kama? soweli li moli ala moli? lon la, sina awen lukin ala la, ni tu li lon tenpo sama: soweli li moli li moli ala. ijo li pakala li pakala ala. lukin ala la, soweli en ijo en ilo li kon wawa. kon wawa li sona pi ijo ken! taso, sona ni li lon pi ma ale pi ijo ale. nasa la, soweli li ken kama moli li ken awen pona lon tenpo lukin taso.

ijo lili pi ken pakala li pakala tan tenpo. taso, pakala ona li kon wawa kin. ijo li lon poka pi kon wawa la, ona li ken kama kon wawa sama. lon la, ijo ale li ken ni tan lukin ala tan pilin ala.

suli la, suno li sijelo li sijelo ala lon tenpo sama. taso, suno li ken kon wawa sama ijo lili tan lukin ala. sina lukin e suno la suno li tawa lon nasin palisa tawa pini. sina lukin ala e suno la, ken ale suno li kama lon tan ni: suno li kama kon wawa! kon wawa la nasin tawa mute li ken. suno li tawa lon nasin ale lon tenpo pi kon wawa. sina lukin e suno la, suno li tawa lon nasin wan taso. taso, sona ni li tan seme? mi pana e ijo sona sin.

lupa tu li lon poki li palisa tawa lukin. suno li tawa insa lupa tu. pilin sina la suno li seme? ken la palisa suno tu li lon insa poki. taso, ante a! palisa suno li mute mute a! lon la, suno li kama kon wawa lon tenpo tawa, li kama suno lon pini. ni la sina ken lukin e ken ale suno.

sina ken ni lon tomo sina a! o jo e poki. o lupa palisa tu e selo poki. o pana e suno tawa lupa tu. o lukin e insa poki. sina lukin e suno nasa a: palisa tu li lon ala. palisa lili mute mute li lon!

palisa mute mute li kama tan seme? kon wawa li tawa nasa. taso tawa nasa la ijo sama li lon. sina pana e kiwen tu tawa supa telo la telo li kama tawa pi sike mute mute. kon wawa li tawa lon nasin ken sama sike ni!