sinpin pi moli loje

A modest adaptation of Edgar Allen Poe's The Masque of Red Death into Toki Pona.

tenpo suli la, moli loje li lon ma ni, li weka e jan mute.

tenpo pini ale la moli pi wawa ni pi jaki ni li lon ala.

sina ken sona e jaki ni tan loje ona.

sina kama jaki ni la, ijo tu wan li kama lon sina.

nanpa wan la, sijelo sina li pilin ike lon ale sama kipisi.

nanpa tu la, sina ken ala tawa pona, li ken ala sewi e lawa sina.

nanpa tu wan la, telo loje sina li weka tan insa sina lon ale pi selo sina. mute nanpa wan la, telo li kama tan sinpin sina.

sijelo sina li kama loje ni la, jan ale li pilin monsuta, li wile ala lon poka sina, li wile ala pona e sina, li weka.

sina kama jaki ni la, sina moli lon insa pi tenpo ilo wan.

jan li pana e nimi tawa jaki ni: sinpin pi moli loje.

taso, jan ale ala li anpa tan jaki ni.

jan Manijo li lawa pi ma ni. ona li pilin ike ala. ona li pilin monsuta ala.

ona li sona e wawa jaki, e ni kin: jan mute pi ma ona li moli tan ni.

taso, ona li pali ala.

tenpo mun luka wan li weka. ma pi jan lawa Manijo la, jan mute li kama moli. sinpin pi moli loje li tu e ma ona.

ni li monsuta ala e jan lawa Manijo. ona li kama toki e ni tawa jan mute pi mani mute:

"o kama! o kama! o kama lon tomo mi! mi ale li ken awen pona lon tomo mi, li ken weka tan moli loje."

jan luka luka ale pi mani mute li tawa tomo wawa pi jan lawa Manijo.

tomo ona li suli wawa li mani mute. ona li nasa mute kin, tan wile nasa pi jan lawa Manijo.

sinpin tomo li suli mute la jan li ken ala tawa sewi ona.

nasin tomo li kiwen wawa la, jan li ken ala pakala e ona.

insa tomo la, jan pali li kepeken ilo ona, li pini e nasin kiwen. nasin tomo li ken ala open sin tan ni. jan li ken ala kama, li ken ala weka.

taso, pona la, tomo li ken awen e jan mute lon tenpo suli. moku mute li lon tomo. telo mute li lon tomo.

musi mute kin li lon tomo. jan pi tawa musi li lon. jan pi kalama musi li lon. lipu musi li lon. telo suwi musi li lon. jan ale tomo li pona tawa lukin.

insa tomo la, jan li ken awen. weka tomo la, moli loje li lon.

sin la tenpo mun luka wan li weka. jaki loje li awen moli e jan mute lon ma pi jan lawa Manijo.

jan lawa Manijo li awen lon tomo wawa ona, li musi e pilin pi jan tomo.

ona li kama e tenpo musi suli lon tomo ona. jan ale li len e lukin pi sinpin ona, li tawa musi sike.

jan ale tomo li pilin wawa e ni: tenpo ni li wawa mute, li musi mute, li pona mute a tawa lukin.

taso, mi o awen. mi o pana e sona ale pi tomo wawa pi jan lawa Manijo.

tomo mute li lon tomo wawa pi jan lawa Manijo. ona ale li kule ante, li wawa ante kin.

taso, jan lawa Manijo li nasa, li sama ala jan lawa ante. tomo pi jan lawa ante li palisa sama ni: sina lon tomo wan la, sina ken lukin e tomo ale.

tomo wawa pi jan lawa Manijo la, sina ken lukin e tomo wan taso lon tenpo wan. sina weka tan tomo wan li tawa tomo ante la, nasin li tawa poka nasa! taso, sina kama lon poka ante nasin la, tomo sin li lon, li wawa sin.

sinpin poka pi tomo ale la, sinpin lukin li lon. ona la sina ken lukin e tawa nasa pi tomo ale.

tomo nanpa wan la ijo ale li laso sama sewi suno. sinpin lukin kin li laso la, suno tomo li laso. tomo ale li sama lon ni, taso kule ona li ante.

tomo nanpa tu la supa en sinpin lukin li laso pimeja.

tomo nanpa tu wan la len en ilo li laso sama kasi.

tomo nanpa tu tu la ale li loje jelo.

tomo nanpa tu tu wan la ale li walo.

tomo nanpa luka wan la ale li laso loje.

taso! tomo nanpa luka tu li nasa suli. ona la supa en sinpin en sewi li pimeja. taso, sinpin lukin li loje sama telo insa.

tomo ni li loje sama insa sijelo la jan ale li wile ala lon tomo ni.

tomo pimeja la, ijo wan li lon, li ante tawa tomo kule ante.

ilo tenpo li lon, li suli tawa jan. jan o lukin a tawa sewi ona.

ona li pimeja sama kiwen.

tenpo ilo suli li pini la, ilo tenpo ni li kalama wawa e sona ni.

kalama ilo li nasa mute tawa jan tomo. kalama ona li ike e pilin kute, li pini e pilin musi, e tawa musi, e kalama musi.

jan tomo li kute e ilo tenpo la, ona ale li awen lon tenpo lili, li awen tawa pini kalama.

kalama li pini la, jan ale tomo li lukin e ona ante, li mu musi lili.

seme la ona li pilin nasa tan ilo tenpo? ni li suli ala a.

ona ale li pilin e ni: tenpo ilo kama la, kalama ilo li pini ala e musi mi.

taso, tenpo ilo kama la, jan ale tomo li awen sin tan kalama suli ilo.

lon la, ilo tenpo li nasa, li nasa e pilin pi jan tomo.

taso, ale ante la, jan ale li musi wawa.

wile pi jan lawa Manijo li nasa mute, taso ona li sona wawa e nasin kule e nasin pi telo nasa e nasin ni: seme la ijo li pona tawa lukin?

jan lawa Manijo li wile ala sama jan ante lon ni. ona li wile sona e insa nasin, li wile pali tan pilin insa ona.

ken suli la, jan pi tomo ala li pilin e ni: jan lawa Manijo li nasa ike lon nasin ona!

taso, jan tomo li sona e wawa ona. sina wile sona e wawa ona la, sina o lon poka ona!

jan lawa Manijo li kama e nasin lon tomo kule ale. ona li toki e ale nasin: supa o lon seme? sinpin o kule seme? palisa suno o lon seme o suno e seme?

kin la jan lawa Manijo li pana e len tawa jan tomo ale lon tenpo musi, li kama e nasin wawa lon ni kin.

taso, len ni li nasa mute. jan wan la len li suli nasa tawa luka ona.

jan ante la len li lili nasa tawa noka ona.

jan ante la suno lili mute li lon len.

jan ante la len li pimeja nasa.

taso, jan ale li kulupu la, nasa ale en kule ale li wan lon tawa musi, li wawa sewi tawa lukin.

tenpo la, ilo tenpo li kalama suli, li pini e musi ale. kalama li pini la, musi ale li kama sin.

tenpo pimeja li kama la, jan ale li weka tan tomo pimeja pi ilo tenpo.

jan li awen musi lon tomo ante.

tenpo pi pimeja suli la, ilo tenpo li kalama wawa lon tenpo luka luka tu.

kalama ona li pini e tawa musi e kalama musi, sama tenpo pini.

jan mute tomo li awen pilin nasa li awen kute e ilo tenpo.

taso, jan pi mute lili li kama sona e ni: jan sin li lon tomo, li len e sinpin ona kepeken sinpin loje.

jan tomo ale li toki pi kalama lili tawa jan tomo ante. jan sin li lon! tenpo seme la ona li kama? len ona li loje a... nasa! mi ken ala lukin e sinpin ona anu seme...

jan tomo li awen toki lon jan loje la, pilin monsuta kulupu li kama suli.

lon la, jan tomo li ken pilin pona tawa jan sin. jan sin li kama ala lon tenpo suli. jan sin li ken ala kama, anu seme.

taso, jan loje la, pilin kulupu li nasa ike tan len loje ona.

ona li len e sinpin la sinpin kiwen ona li sama sinpin pi sijelo moli.

len luka en len noka en len sinpin ale li loje sama telo insa sijelo.

telo sijelo li lon sinpin kiwen ona kin.

jan tomo li ken pilin pona tawa ni ale.

taso, jan ni li len e sijelo ona la ona li sama moli loje tawa lukin.

jan lawa Manijo li kama lukin e jan loje la ona li mu wawa e ni:

"sina seme?"

"sina seme li wile anpa e pilin ike pi mi ale, e wile awen pi mi ale?"

"ale! o weka e len sinpin ona! o weka e len ona! ni la mi ken sona e ni: mi moli e jan seme lon open suno, li pana e sijelo seme tawa sewi pi sinpin tomo."

jan ale tomo li awen.

"sina ale li kute ala anu seme? o pini e jan ni, o weka len ona, o weka e loje tan ona!"

jan lawa Manijo li lon tomo pi laso sewi lon tenpo ni.

ona li wawa mute lon kalama, li sona pana wawa e wile ona.

ni la, jan ale tomo li ken kute e jan lawa Manijo lon tomo ale.

jan musi mute li lon poka pi jan lawa Manijo, taso ona ale li tawa ala, li lukin taso e jan loje.

ona ale li pilin nasa wawa tan jan sin. jan pi mute lili li tawa lili, taso ona ale li wile ala luka e jan sin.

ni la, jan loje li tawa kepeken tenpo suli, li tawa poka pi jan lawa Manijo.

jan musi ale li weka tan jan loje, li pini ala e ona.

jan loje li weka tan tomo pi laso sewi, li kama lon tomo pi laso pimeja, li lukin e jan ale tomo, li tawa poka ona.

ona li weka tan tomo ni kin, li kama lon tomo pi laso kasi, li tawa tomo pi loje jelo, li tawa tomo walo, li kama lon tomo pi laso loje.

taso, jan loje li weka tan tomo pi laso loje li tawa tomo pimeja la jan lawa Manijo li pilin wawa e wile utala.

ona li pilin anpa, kin, tan ni: ona li pali ala lon tenpo pini poka.

jan lawa Manijo li tawa wawa lon tomo ale, li alasa e jan loje, li wile moli e ona.

jan tomo ale li awen, li lukin taso.

jan lawa Manijo li kama lon tomo pimeja, li tawa poka pi jan loje.

jan loje li tawa sike, li lukin e jan lawa Manijo, li luka e ilo kipisi tan len ona, li pana wawa e ni tawa sijelo pi jan lawa Manijo.

jan lawa Manijo li mu e pilin ike ona, li tawa anpa, li moli.

ilo kipisi kin li tawa anpa, li kalama kiwen lon supa.

jan lawa Manijo li kama moli la, jan ale tomo li kama pilin wawa, li kulupu, li alasa e jan loje, li kama jo e ona e len ona kin.

jan tomo li kama jo e jan loje la, ona li kama jo e len taso, li weka e ni tan sijelo ala. jan li lon ala len. taso la, moli loje li lon.

ni la, jan ale tomo li kama sona e ni: moli loje li kama. ona li kama lon tenpo pi pimeja suli, li pali wile lon tomo, li weka.

tenpo lili li weka. jan ale tomo li awen, li pilin.

ona wan li kama loje lon sinpin ona.

ona li mu wawa e pilin ike pi sijelo ona, li mu wawa e ni: "o pona e mi! o awen e mi!" taso, jan ante li tawa ala poka ona. tenpo la, ona li tawa anpa, li moli.

jan ante li kama loje lon sinpin, li kama esun ala e kon, li tawa anpa.

sama ni la, jan musi ale li kama moli loje. tomo pi jan lawa Manijo la supa li kama loje tan telo insa pi jan musi ale.

tomo la, kalama ale li pini.

jan ale li moli la jan li sin ala e ilo tenpo pimeja.

ilo tenpo li mu pini, sama pini pi jan musi.

jan ale li moli la, jan li sin ala e seli pi palisa suno. suno ale li weka tan tomo.

tenpo ale la, pimeja, en jaki, en moli loje li lawa e ale.