musi ni la sina ken ala toki e lawa. taso lipu ni li pana e sona lawa tan ni: mi tu li lon ala poka la sina ken ala musi!

taso, sina ken pana e musi ni tawa jan poka sina, a a a

• ijo jo
• lawa
  • tawa open
  • tawa jan ale
  • tawa jan pana
  • tawa nanpa lipu
  • tawa kulupu lipu
  • tawa pini
  • ijo tan lawa

ijo jo

• o jo e lipu mute mute luka luka tu.
• kule lipu tu li ni:
  • 🟥 loje
  • ⬛ pimeja
• kulupu lipu tu tu li ni:
  • ♥️ pilin
  • ♠️ ilo
  • ♦️ kiwen
  • ♣️ kasi
• nanpa lipu luka luka tu wan li ni:
  • A - ken
  • 2 - tu
  • 3 - tu wan
  • 4 - tu tu
  • 5 - luka
  • 6 - luka wan
  • 7 - luka tu
  • 8 - luka tu wan
  • 9 - luka tu tu
  • 10 - luka luka
  • J - jan
  • Q - meli
  • K - mije

lawa

• jan li pakala la o pana e lipu tawa ona o toki e pakala ona.
• lawa li toki ala e toki pakala la o toki pona e lawa ona lon ni: "o ni: ..."

tawa open

• jan lawa o pana e lipu tu tu tu wan tawa jan ale.
  • lipu pi awen lon li kama kulupu lipu li tawa jan ale.
• open la jan lawa o pana e lipu tan kulupu lipu tawa kulupu sin.
  • kulupu ni li kulupu lawa.
  • jan lawa li ken ala pana e lipu open tan lipu ona. taso la lipu open o tan kulupu lipu.
• jan lawa li pana e lipu open la ona o toki e ni: "musi o open"
• jan lawa li open e musi la ona o kama jan pana
• jan nanpa kama la o tawa poka ni: jan lawa la luka ona pi wawa ala li poka seme?

tawa jan ale

• jan ale o pilin ala e lipu ona lon tenpo pi musi ala.
  • jan li pilin e lipu ona lon tenpo pi musi ala la o pana e lipu o toki e ni: "pilin"
  • o lukin e tawa open: musi li open ala la ni li tenpo pi musi ala!
• jan ale o toki ala lon tenpo musi
  • jan li toki la o pana e lipu o toki e ni: "toki"
  • jan li ken toki lon tenpo pi musi ala.
• tenpo ale la jan ale li ken toki e ni: "tenpo o toki".
  • tenpo toki la jan ale li ken toki
  • tenpo toki li tenpo pi musi ala. ni la jan ale o jo ala e lipu ona!
  • jan ale li ken pini e tenpo toki kepeken toki ni: "tenpo o musi."
• jan ale li ken pana e lipu tan pakala tawa jan pakala.
• jan li pakala mute lon tenpo wan la ona o pana e lipu tan pakala ale!

tawa jan pana

• jan pana o pana e lipu tawa kulupu lawa.
• jan pana taso li ken pana e lipu.
  • jan ante li pana e lipu la ona o kama jo e lipu ona. o pana e lipu tawa ona o toki e ni: "sina jan pana ala"
• jan pana o pana e lipu pi kulupu sama anu lipu pi nanpa sama.
  • ona li pana e lipu ike la o pana e lipu tawa ona o toki e ni: "kulupu o pona"
  • ona li pana ike la ona o pana pona!
• ona li ken kama jo e lipu tan kulupu lipu.
  • ni la jana kama o musi.
  • ona li ken pana e lipu jo lon tenpo jo
• ona li pana e lipu la ona li ken toki e lawa lipu taso.
  • lawa toki la ona li toki ala la o pana e lipu tan toki ala!

tawa nanpa lipu

• nanpa ken la jan kama o pana ala e lipu. jan kama nanpa tu o kama jan pana o pana.
• nanpa tu la jan pana o toki e ni: "sewi li lon." ona o pana e lipu sin kin
  • ona li pana sin ala la o toki e ni: "sina pana sin ala"
  • pakala tu li ken: ona li ken toki ala li ken pana ala e lipu nanpa tu!
• nanpa luka wan la jan pana o toki e ni: "o pona tawa kule."
• nanpa meli la jan pana o toki e ni: "o pona tawa meli."
• nanpa mije la jan pana o toki e ni: "o pona tawa mije."

tawa kulupu lipu

jan li pana e lipu pi kulupu ike la o toki e ni: "o pana e lipu pona"

• kulupu ilo la o toki e kulupu e nanpa. toki ken li ni:
  • "ilo nanpa tu tu."
  • "ilo nanpa meli."
  • "ilo nanpa mije."
  • "ilo nanpa ken."

tawa pini

• jan pana li jo e lipu wan taso la ona o toki e ni: "mi wan".
  • o ni lon tenpo pana!
• jan pana li pana e lipu ona nanpa pini la ona o toki e ni: "musi o pini."
• jan pini li ken pana e lawa sin!
  • lawa sin li ken ale!
• tenpo suno li pini la lawa sin ale o weka.

ijo tan lawa

jan li ken pilin e lipu pi jan ante lon tenpo pi musi ala

toki pakala mute li ken. o lukin:

• "o ni: ilo nanpa meli. o pona tawa meli."
  • jan pana li pana e lipu nanpa meli pi kulupu ilo.
• "o ni: ilo nanpa luka wan. o pona tawa kule."
  • jan pana li pana e lipu nanpa luka wan pi kulupu ilo.
• "o ni: sewi li lon. sina pana sin ala. toki."
  • jan pana li pana e lipu nanpa tu, li toki pakala, li pana ala e lipu wan taso.
  • ona li kama jo e lipu tu wan!
• "o ni: mi wan."
  • jan pana li toki ala e ni
• "o ni: musi o pini."
  • jan pana li toki ala e ni
• "pilin."
  • jan li pilin e lipu ona lon tenpo pi musi ala
• "toki"
  • jan li toki lon tenpo musi
• "kulupu o pona"
  • jan li pana e lipu ike. kulupu ona en nanpa ona li ike la ona o pana e lipu pona!