jan pi alasa kala en jan olin ona

jan pi alasa kala en jan olin ona

lon tenpo pona la, jan pi alasa kala en jan olin ona li lon. ona tu li lon tomo lili. tomo lili li lon selo pi telo suli a! tenpo suno ale la, jan kala li tawa telo, li jo e ilo alasa, li alasa e kala lon tenpo mute. tenpo suno wan la, jan kala li awen, li kepeken ilo alasa, li lukin e telo pona. ona li awen lon tenpo mute mute.

tenpo kama la, ilo alasa ona li tawa anpa telo! jan kala li kama jo e ona. lon pini pi ilo alasa la, kala suli li lon! kala suli li toki e ni: "jan pi alasa kala, o kute e toki mi, o awen ala e mi! mi kala ala. mi jan lawa pi wawa nasa! sina moli e mi la, mi pona ala e sina. sina moku e mi la, mi jaki! ante la, o moli ala e mi, o pana e mi tawa telo, o ken e tawa mi!"

jan kala li toki: "nnn, mi sona e toki sina! o toki mute ala. tan toki sina la, mi wile e ni: sina tawa pona." jan kala li pana e kala suli tawa telo, li ken e tawa ona. kala suli li tawa anpa telo. tenpo kama lili la, jan kala li ken ala lukin e ona.

jan kala li tawa tomo lili ona, li toki tawa jan olin ona. jan olin li toki e ni: "olin mi o, sina jo ala jo e kala?" jan kala li lukin anpa, li jo ala e kala. ona li toki:"ala. tenpo suno ni la, mi jo ala e kala. nnn, ante la, mi jo e kala wan lon tenpo pini. taso, kala ni li ken toki, li toki e lawa ona, li toki e wawa nasa ona!" jan olin li toki: "sina toki e wile sina tawa ona anu seme?" jan kala li wile sona: "seme? mi toki ala e wile mi. mi wile e seme? mi sona ala." jan olin li pilin utala tan ni! "tan seme la ni?! tomo lili mi li ike mute. mi lon ona la, mi pilin ike. kon ona li jaki. supa ona li jaki. lukin ona li jaki! ken la, o wile e tomo pona tan kala. o toki tawa ona, o wile e tomo pona! sina ni la, pilin mi li ni: kala li pana e tomo pona tawa mi tu!"

jan kala li tawa sin la, telo suli li jelo li laso. jan kala li ken ala lukin insa telo. ona li toki tawa kala, li wile e ni: "jan o, jan o! ken la, ni. ante la, kala o, kala o, lon telo suli! olin mi li ike e mi, li wile e wile ala mi." tan ni la, kala li kama tan telo, li toki: "olin sina li wile e seme?" jan kala li toki sin: "mi kama jo e sina la, olin mi li pilin e ni: o wile e ijo tan kala wawa! olin mi li wile ala awen lon tomo lili. ona li wile e tomo sin, e tomo pona!" tan ni la, kala li toki: "o tawa tomo sina. olin sina li jo e tomo pona."

tan toki kala la, jan kala li tawa tomo ona. ona li kama la, ona li lukin e tomo pona! jan olin ona li lon supa lon ma pi tomo ona. jan olin li kama jo e luka ona, li toki: "o kama! o lukin! tomo lili la, tomo ni li pona mute a!" ona tu li tawa insa, li lukin. lon tomo pona la, ilo pona mute li lon. tomo lape pona li lon, li jo e supa lape pona kin! tomo moku li lon kin, li jo e moku pona e ilo moku pona. lon ma monsi pi tomo pona la, waso telo mute en ma kasi pi kili pona li lon! tan ale ni la, jan olin li toki: "o lukin! ale ni li pona anu seme?" "a, pona. ale ni li pona. ale ni li lon lon tenpo suli la, sina en mi li ken pilin pona mute." taso, jan olin li toki: "nnn, ken la, mi pilin pona." ona tu li moku, li lape.

ale li pona lon tenpo suno mute. taso, tenpo suno wan la, jan olin li toki tawa jan kala: "mi pilin ike lili, li wile sin. ken la, tomo pona li lili. ken la, ma ona en ma kili ona li lili, li ike. taso, kala li ken pana e tomo suli sin! mi wile e tomo sin, e tomo wawa, e tomo pi jan lawa!" jan kala li pilin nasa tan toki ni. "tan seme la ni? olin mi o, tomo pona pi mi tu li pona mute. tan seme la mi tu li wile e tomo wawa?" jan olin li toki kepeken kalama suli! "a! o wile e ni!" taso, jan kala li awen, li wile sona e wile pi jan olin ona. "taso, mi tawa sin la, mi ken pakala! kala li pana e tomo ni tawa mi tu. ken la, ona li pilin ike tan kama mi." jan olin li kute ala e ni. "o tawa! o toki tawa kala. ken la, ona li pana e tomo wawa tawa mi tu. ken la ala. o kute e mi, o toki tawa kala!" jan kala li wile ala e ni, li toki insa e ni: "nnn, wile ni li pona ala." taso, ona li tawa sin.

jan kala li tawa sin la, telo suli li laso pimeja, li laso loje, li ike lili lukin. ona li toki tawa kala, li wile e ni: "jan o, jan o! ken la, ni. ante la, kala o, kala o, lon telo suli! olin mi li ike e mi, li wile e wile ala mi." tan ni la, kala li kama tan telo, li toki: "olin sina li wile e seme?" jan kala li pilin monsuta lili, li toki: "ona li wile e tomo wawa, e tomo pi jan lawa." kala li kute, li toki e ni: "o tawa tomo sina. olin sina li jo e ni."

jan kala li tawa tomo ona. taso, ona li kama la, ona li lukin e tomo suli, e tomo wawa a! jan olin ona li lon leko pi tomo wawa, li wile tawa insa. ona li kama jo e luka pi jan kala, li toki: "o kama insa."

ona tu li tawa insa tomo wawa. lon tomo ona la, tomo palisa suli pona li lon. supa pi tomo ni li kiwen pona, li jasima e sinpin pi ona tu. jan pali mute li lon, li pona e ona tu, li tawa e ona tawa tomo sin. lupa suli pona li lon tomo ale. tomo mute li jo e len supa pona a, e supa awen mani, e ilo suno pi kiwen lukin! supa moku ale li jo e len lili lon ona, li jo e telo nasa pona. lon monsi pi tomo wawa la, tomo soweli li lon, li jo e soweli tawa, e soweli mani, e tomo tawa soweli pona. ante la, ma kasi suli pi kili pona li lon poka pi tomo soweli! ma ni li jo e kasi kule, e kasi suli kili! kin la, ma suli pi soweli mute li lon, li jo e wile ale pi jan ale.

jan olin li sinpin pona, li toki: "pona a! ni li pona lukin anu seme?" jan kala li sinpin pona kin, li toki: "pona lukin a! sina en mi li lon tomo wawa ni lon tenpo suli la, mi tu li pilin pona lon tenpo ale." taso, jan olin li sinpin ike tan ni, li toki: "ken la ni. tenpo ni la, sina en mi o lape."

suno open kama la, jan olin li lape ala, li lukin e ma ale pona lon poka pi tomo wawa ona. jan kala li lukin ala e ni la, jan olin li luka e ona. ni la ona li lape ala. jan olin li toki: "o lukin e ma ale lon poka pi tomo mi! ken la, sina en mi li jan lawa pi ma ale ni la, mi tu li pona mute. mi wile e ni! o tawa, o toki tawa kala sina! ona li ken pana e ni." jan kala li wile ala e ni, li toki: "olin mi o... mi tu li wile lawa tan seme? mi wile ala e ni. mi sona ala e nasin tawa ni!" taso, jan olin li kute ala e ni. ona li toki: "sina wile ala lawa la, mi lawa. o toki tawa kala sina!" jan kala li toki sin: "sina wile e ni tan seme? mi ken ala toki e ni tawa kala." jan olin li awen toki: "tan seme? o tawa, o tawa! mi o lawa." tan ni la, jan kala li tawa kala, li pilin ike. ona li wile ala tawa, taso ona li tawa.

jan kala li tawa sin la, telo suli li pimeja mute, li kama insa ma. kon pi telo suli li ike mute kin. jan kala li toki tawa kala, li wile e ni: "jan o, jan o! ken la, ni. ante la, kala o, kala o, lon telo suli! olin mi li ike e mi, li wile e wile ala mi." kala li toki: "olin sina li wile e seme?" jan kala li toki e wile pi jan olin: "ona li wile jan lawa." jan kala li toki: "o tawa tomo sina. ona li jan lawa lon tenpo ni."

jan kala li tawa tomo ona, li lukin e ni: tomo ona li suli mute, li kama tomo wawa mani a! jan li lon leko pi tomo sinpin, li awen e ona. jan utala mute li lon, li kalama musi a lon tawa pi jan kala! jan kala li tawa insa tomo, li lukin e selo mani mute, e len mani pi lupa lukin. ona li awen tawa la, ona li kama tawa tomo pi supa lawa. lon supa la, jan olin li lon, li jo e namako pi mani mute lon lawa ona. luka ona la, palisa mani pi kiwen jelo li lon. lon poka ona, jan mute li lon, li kute e toki ale ona. jan kala li kama tawa ona, li toki: "tenpo ni la, sina jan lawa!" jan olin li toki: "a, mi jan lawa."

lon tenpo suli la, jan kala li lukin e jan olin. ona li toki: "ni li pona! sina jan lawa la, wile sina li pini. sina wile ala e ijo sin." taso, jan olin li wile sin: "ike! mi wile ala kute e ni. o tawa kala sina, o toki e ni: mi wile jan lawa wawa. mi wile jan lawa pi ma ale!" ni la, jan kala li pilin ike. "sina wile jan lawa wawa tan seme? sina jo e wile ale sina!" taso, jan olin li kute ala e ni. "o tawa, o tawa! sina jan olin mi la sina ken ni. o tawa, o ni!" jan kala li pilin monsuta kin. "taso, ken la kala li pilin utala, li pana ala e ni! mi ken ala toki tawa ona. mi ken ala! kin la, jan lawa pi ma ale la wan taso li lon. nasin seme la sina ken jan lawa wawa?" taso, jan olin li kute ala e ni kin. "kala sina li jan lawa e mi la, ona li ken jan lawa wawa e mi! o tawa, o pana e wile mi." ni la, jan kala li tawa. taso, ona li toki insa e ni: "ni li ike mute. jan olin mi li wile jan lawa la ni li pakala mute. kala li wile ala kute e ni."

jan kala li tawa sin la, telo suli li pimeja mute. ko telo li lon ona, li tawa mute tan kon wawa a! jan kala li pilin monsuta mute. taso, ona li toki tawa kala, li wile e ni: "jan o, jan o! ken la, ni. ante la, kala o, kala o, lon telo suli! olin mi li ike e mi, li wile e wile ala mi." tan ni la, kala li kama tan telo, li toki: "olin sina li wile e seme?" jan kala li toki sin: "jan olin mi li wile jan lawa wawa. ona li wile jan lawa pi ma ale." kala li toki: "o tawa tomo sina. olin ona li jan lawa wawa."

jan kala li tawa tomo ona. ni la, ona li lukin e tomo wawa suli. ona li suli tawa sewi laso, li jasima e suno lon ma poka ale. jan utala li lon poka lupa, li lon kulupu pali, li kalama musi tan kama pi jan kala! jan lawa ante li lon, li tawa mute, li pali tawa jan lawa wawa sama jan pali. jan olin li lon supa pi kiwen jelo suli. kiwen jelo li suli mute tawa sewi. jan kala li alasa lukin e ona. ona li lukin la, ona li lukin e namako jelo suli lon lawa pi jan olin! luka ona la, palisa mani suli en sike pi ma ale li lon. lon supa ona la, jan olin li wawa mute, li mani mute. lon poka ona la, jan pali suli mute en jan pali meso en jan pali lili lili li lon! ona ale li lon kulupu. jan suli li lon monsi kulupu, li lon poka pi jan olin. jan lili li lon sinpin kulupu. lon ma ni la, jan lawa mute li lon, li pali tawa jan olin.

jan kala li tawa jan olin, li toki: "olin mi o, sina jan lawa wawa." jan olin li toki: "a, mi lawa wawa. mi jan lawa pi ma ale." jan kala li kute e ni, li pilin pona, li toki: "tan ni la, sina pini ale. sina lawa wawa la, sina ken ala kama suli ante!" taso, jan olin li pilin ante, li toki: "sina toki e seme? mi lawa wawa. taso, mi wile sin. mi wile jan sewi suli. o toki tawa kala sina, o toki e ni!" jan kala li pilin monsuta mute tan toki ni! ona li toki "tan seme? tan seme? sina jo e ijo la, sina wile e ijo sin! sina ken ala kama sewi suli. jan sewi suli pi wan taso li lon. jan kala li ken ala pana e ni." jan olin li kute ala e ni, li toki "kala li ken e ni! mi kama jan sewi suli tan ona. ni la, o tawa, o toki tawa ona!" jan kala li pilin nasa mute, li wile ala ni. ona li toki: "mi toki e ni tawa kala tan seme? wile ante la wile ni li ike mute mute!" taso, jan olin li kute ala e ni kin, li toki: "ni li ike ala! ante la, kala li lawa wawa e mi la, ona li ken jan sewi suli e mi. mi jan lawa wawa! sina jan olin mi taso. sina o tawa kala, o toki tawa sina."

jan kala li tawa sin, li pilin monsuta mute. sijelo ona li tawa lili tan monsuta. kon wawa li lon, li tawa e ona. walo sewi li kama pimeja, li tawa tan kon wawa. suno li lon ala. sewi li kama pimeja sama tenpo pimeja. telo suli li kama suli tawa sewi tan kon wawa kin. ona li tawa selo pi telo suli, li toki tawa kala, li wile e ni: "jan o, jan o! ken la, ni. ante la, kala o, kala o, lon telo suli! olin mi li ike e mi, li wile e wile ala mi." tan ni la, kala li kama tan telo, li toki: "olin sina li wile e seme?" jan kala li toki: "olin mi li wile jan sewi suli." kala li toki: "ona li jan sewi suli. o tawa tomo sona."

ona li tawa tomo ona. ni la, ona li lukin e tomo sewi suli! lon poka pi tomo ni la tomo wawa mute li lon. jan kala li tawa lon kulupu suli jan. ona li kama insa la, suno lili mute mute li lon selo tomo, li lon sewi tomo, li lon supa tomo. jan olin li jo e len mani, li lon lon supa suli, li jo e len lawa pi kiwen mani! lon poka ona la, palisa suno li lon, li suli li meso li lili. palisa suno li suli sama tomo lukin suli. palisa suno li lili sama suno luka. jan lawa wawa en jan lawa suli en jan lawa ale li lon ma, lon poka pi jan olin. ona ale li uta e noka sina.

jan kala li toki: "a... jan olin mi o, sina jan sewi suli." jan olin li toki tawa ona: "a, mi jan sewi suli!" jan kala li lukin e ona lon tenpo suli. ona li lukin mute la, ona li pilin nasa. nasa ni li sama lukin pi suno sewi. tenpo suli li pini la, jan kala li toki: "olin mi o, lon tenpo ni la, sina wile e seme?" jan olin li awen lon supa suli, li toki ala lon tenpo suli. jan kala li toki sin: "ken la, sina wile sin ala. sina jo e ale. tan ni la, sina ken ala kama suli sin." taso, jan olin li toki "ken la, ni." ona tu li tawa tomo lape. jan olin li ken ala lape tan toki insa ona. ona li wile sona e ni: "mi wile e seme sin?"

lon tenpo suno pini la, jan kala li tawa mute, li pali mute! ni la, ona li lape pona mute. taso, jan olin li alasa lape la ona li tawa mute, li ken ala lape pona lon tenpo pimeja. ona li toki insa lon tenpo pimeja ale. taso ona li sona ala e wile sin ona! lon tenpo suno kama la, ona li lukin e sewi loje, e suno. tan ni la, ona li sona! ona li tawa jan kala, li toki: "mi sona! mi sona! jan olin mi o kute e ni: mi wile lawa e suno e mun. jan olin mi o tawa kala sina, o toki e ni tawa ona!" jan kala li kama lape ala tan ni, li sona ala e toki ona. ona li wile sona: "jan olin mi o, sina toki e seme?" jan olin li awen toki: "o lape ala! sina o tawa kala sina. mi ken ala lawa e suno e mun la, mi ike lon tenpo ale!" taso, jan kala li sona ala e nasin tawa wile ona. ona li toki e ni: "olin mi o, kala li ken ala ni! kala li ken e jan lawa, e jan lawa wawa, e jan sewi suli! taso, ona li ken ala pana e lawa suno e lawa mun. ona li ken ala! ni la, o wile ala e lawa ni!" jan olin li wile ala kute e ni. ona li wile lawa e suno e mun. ni la, ona li toki: "o tawa, o tawa!"

ni la, ona li tawa, li pilin monsuta tan wile pi jan olin ona. lon tawa la, kon wawa en sewi wawa li kama. ni la ona li ken ala tawa pona. tomo en kasi suli li pakala tan kon wawa! nena suli li tawa mute. kiwen suli li tawa anpa tan ona, tawa telo suli. sewi li pimeja lukin, li ike mute. ko telo li lon telo suli tan kon wawa. telo suli li pana e telo wawa a tan kon! ale ni la, jan kala li wile ala tawa. taso, ona li kama tawa kala. ona li ken ala kute e toki ona tan kalama ike pi kon wawa! taso ona li toki: "jan o, jan o! ken la, ni. ante la, kala o, kala o, lon telo suli! olin mi li ike e mi, li wile e wile ala mi." tan ni la, kala li kama tan telo, li toki: "olin sina li wile e seme?" jan kala li toki: "olin mi li wile lawa e suno e mun." kala li kute e ni, li toki: "o tawa tomo sina! jan olin ona li lon tomo lili." ni la, jan pi alasa kala en jan olin ona li lon tomo lili lon tenpo ale.