jan monsuta loje li pana e telo tan lukin

tenpo wan la jan monsuta loje li lon. jan monsuta ni li jan monsuta pona. ona li wile ala ike li wile ala pakala li wile e ni taso: ona li jan pona pi jan mute mute. taso, ona la jan pona wan taso li lon. jan pona ona li jan monsuta laso.

ma tomo lili li lon ma poka pi jan monsuta loje. jan mute pi monsuta ala li lon ma tomo ni. jan monsuta loje li wile jan pona pi jan mute ni, taso ona li wile ala toki tawa jan monsuta loje. ona li lukin e jan monsuta la ona li tawa weka. ona li pilin e ni: jan monsuta ni li monsuta li ike.

tenpo suno wan la jan monsuta loje li pana e lipu suli lon sinpin tomo ona li sitelen e ni lon lipu: "mi jan monsuta pona. mi wile musi taso. jan ale o kama tawa insa tomo mi. mi wile pona tawa sina." ona li pilin e ni: "jan li lukin e sitelen ni la ona li sona e wile pona mi. ken la jan mute li kama tawa tomo mi li ken kama jan pona mi!" taso jan ala li kama. jan pi ma tomo li awen weka.

jan monsuta laso li lukin e ni li pilin ike. ona li wile pana e pona tawa jan monsuta loje. ona li toki e ni: "jan pona mi o, mi sona e nasin pona. mi o ike, o pakala, o monsuta lon ma tomo. ni la sina o kama, o utala e mi, o anpa e mi. jan pi ma tomo li lukin e ni la ona li ken sona e ni: sina jan pi wile pona." jan monsuta loje li kute e ni la ona li sona ala e ni: nasin ni pi jan monsuta laso li pona ala pona? taso pini la ona li toki e ni: "pona. mi tu o pali sama toki sina."

tenpo suno kama la jan monsuta laso li tawa ma tomo. ona li mu wawa li pakala e ijo lili mute. jan ale pi ma tomo li pilin monsuta wawa a! ona li pilin e ni: "ike mute a! tomo mi li kama pakala a! ken la mi kama moli a!"

ni la jan monsuta loje li kama tan ma kasi li toki e ni: "jan mute o pilin monsuta ala! mi ken anpa e jan monsuta ike ni!" ona li utala e jan monsuta laso li anpa e ona li weka e ona tan ma tomo. jan pi ma tomo li lukin e ni la ona li pilin pona a! ona li toki e ni: "jan monsuta loje o, sina jan pona a! pali sina li awen e mi e ma tomo ale mi!"

jan pali pi ma tomo en jan monsuta loje li pona e ijo pakala lon ma tomo. jan lili en jan monsuta loje li musi pona lon tenpo suli. jan mute li wile toki tawa jan monsuta loje li pana e moku pona tawa ona. jan monsuta loje li pilin pona tan ni: wile ona li kama lon a! jan mute li jan pona tawa ona a!

tenpo lili li weka la jan monsuta loje li toki insa e ni: "tenpo pini lili la mi lukin ala e jan monsuta laso. ona li lon seme?" jan monsuta loje li tawa tomo pi jan monsuta laso, taso ona li lon ala tomo ona. lipu taso li lon lupa tomo.

sitelen ni li lon lipu:

"jan pona mi o. mi lukin e ni: sina pilin pona lon jan pi ma tomo. mi pilin pona tan pilin pona sina. taso, ni la mi ken ala lon poka sina. jan pi ma tomo li lukin e mi tu la ona li ken kama sona e ni: sina jan pona mi. ona li kama sona e ni la, ken la jan pi ma tomo li wile ala jan pona sina. mi wile ala e ni. tan ni la mi o tawa weka tan ma ni. o awen pona. o pilin pona lon jan pona sin sina. mi tawa. jan monsuta laso."

jan monsuta loje li lukin e lipu ni la ona li pana e telo tan lukin ona li pilin ike mute tan ni:

jan pona ona pi pona nanpa wan li weka a.