jan lawa meli lon kili lili

jan lawa meli lon kili lili

lon tenpo pona la, jan lawa mije li lon. ona li wile wan olin e jan lawa meli. taso, jan meli ni li lawa lon ala la, mije lawa li olin ala e ona. mije lawa li tawa ma ale, li alasa e meli pi lawa lon! taso, lon ma ale la, mije lawa li ken ala alasa e meli pi lawa lon. jan lawa meli li lon ma ale! taso, mije lawa li sona ala e ni: meli ni li lawa lon anu seme? mije lawa li lukin e meli la, ona li lukin e meli pi lawa lon ala. tan ni la, mije lawa li pini e alasa, li tawa tomo ona, li pilin ike. ona li wile e meli pi lawa lon.

lon tenpo pimeja kama la, telo ike mute li kama! sewi li suno wawa, li kalama suli, li pana e telo mute mute.

lon lupa pi tomo suli la, kalama li kama! jan lawa majuna li open e lupa.

lon sinpin lupa pi tomo suli la, jan lawa meli li lon! taso, telo mute en kon wawa li ike e ona. linja ona en len ona li jo e telo mute. len noka ona li jo e telo mute mute! kin la, monsi pi len noka ona li pana e telo a! taso, ona li toki e ni: "mi jan lawa meli. mi lawa lon."

majuna lawa li toki insa e ni: "ni li lon ala. meli ni li lawa lon ala!" taso, majuna lawa li toki ala. ona li tawa tomo lape, li weka e len lape tan supa lape. kin la, majuna lawa li pana e kili lili tawa ona! ona li pana e len supa lape mute mute lon kili lili, lon supa lape.

lon tenpo pimeja ale la, meli lawa li lape lon supa lape ni. lon open pi tenpo suno la, majuna lawa li wile sona e ni: "lape sina li pona ala pona?"

meli lawa li toki: "lape mi li pona ala! lon tenpo pimeja ale la, mi ken ala lape! oko mi li pilin ike. mi sona ala e nasin pi ike mi. mi sona ala e ike pi supa lape. taso, mi lape lon ijo kiwen ike. ijo ni li ike e sijelo mi. mi pilin ike mute tan ni."

tan toki ona la, majuna en mije li sona e ni: meli li pilin e kili lili, li lawa lon!

jan ante li ken ala pilin e kili lili lon anpa pi supa lape mute mute. taso, jan meli pi lawa lon li ken!

jan lawa mije li sona e ni: meli ni li lawa lon! tan ni la, jan lawa mije li wan olin e jan lawa meli. kin la, ona li pana e kili lili ni tawa tomo pi sona majuna. jan li lanpan ala, li moku ala la, sina ken lukin e kili lili lon tomo ni!